Somos os

Somos a porta de entrada á atención dos servizos sociais.

Se necesitas apoio, estamos preto!

Escoitámoste, analizamos contigo as túas dificultades e axudámoste a activar os recursos que precisas para mellorar a túa calidade de vida.

Se formas parte dun colectivo cunha situación ou necesidade específica este é o teu lugar!
Traballamos para ofrecerche apoio adaptado e eficaz!
Poñemos en marcha programas específicos e xestionamos centros orientados a cubrir as túas necesidades singulares e identificadas.

Se estás vivindo ou detectas unha situación de urxencia social fóra do horario habitual, contacta con nós!

• Actuamos ante situacións inesperadas de desprotección social.
• Realizamos rutas con unidades móbiles para atender as persoas sen fogar.
• Activamos dispositivos especiais en caso de frío ou condicións meteorolóxicas extremas.
• Ofrecemos atención inmediata e especializada en casos de vulnerabilidade:
  • De luns a venres: de 15:00h – 8:00 h (día seguinte)
    Fins de semana e festivos: atención 24 horas
    Chama ao 112 ou ao 981 54 23 23
    Atenderémoste!

Carta de DEREITOS das persoas en relación cos servizos sociais (art. 6 da Lei 13/2008, do 3 de decembro, de servizos sociais de Galicia)

• Ao respecto da dignidade da persoa, da súa autonomía, intimidade e do seu benestar.
• A utilizar o sistema de servizos sociais en condicións de igualdade e sen discriminación.
• A recibir un trato acorde coa dignidade da persoa e co respecto dos dereitos e das liberdades fundamentais.
• A unha intervención individualizada, acorde coas súas necesidades específicas, así como a que se lles asista nos trámites necesarios.
• A recibir información de xeito áxil, suficiente e veraz, en termos comprensibles, sobre os recursos e as prestacións do sistema galego de servizos sociais.
• A ter asignada unha persoa profesional de referencia.
• Á confidencialidade, ao sixilo e ao respecto en relación cos seus datos persoais e coa súa información que sexa coñecida polos Servizos Sociais.
• A acceder ao seu expediente persoal e a obter copia del.
• A elixir libremente, dentro da capacidade de oferta do sistema e logo da valoración técnica, o tipo de medidas ou de recursos adecuados para o seu caso.
• A rexeitar a oferta de participación en servizos ou programas que lles oferte o sistema.
• Á calidade dos servizos e prestacións recibidas.
• A dar instrucións previas respecto da asistencia ou dos coidados que se lles poidan administrar.
• Ao respecto dos dereitos lingüísticos das persoas usuarias.

FUNCIÓNS DOS SERVIZOS SOCIAIS COMUNITARIOS BÁSICOS (art. 11 da Lei 13/2008, do 3 de decembro, de servizos sociais de Galicia)

• O estudo e diagnóstico social da comunidade.
• A elaboración dun plan de intervención comunitario.
• A identificación de grupos de poboación vulnerables e a detección precoz de situacións de risco.
• A atención das situacións individuais, a información, o diagnóstico e a valoración técnica.
• A participación na xestión das prestacións económicas e o seguimento dos correspondentes proxectos de intervención social.
• A xestión do servizo de axuda no fogar e a participación na xestión das prestacións destinadas a garantir a autonomía persoal e a atención á dependencia.
• A información, a orientación e o asesoramento a toda a poboación, facilitando o seu acceso aos recursos sociais existentes.
• O fomento da participación activa da cidadanía mediante estratexias socioeducativas que impulsen a solidariedade social.

Carta de DEBERES das persoas en relación cos servizos sociais (art. 7 da Lei 13/2008, do 3 de decembro, de servizos sociais de Galicia)

• Cumprir as normas, os requisitos e os procedementos para o acceso ao sistema galego de servizos sociais.
• Comunicarlle ao persoal de referencia calquera cambio significativo de circunstancias que puidese implicar a interrupción ou a modificación da intervención proposta dende os servizos sociais.
• Colaborar co persoal encargado para prestarlles a atención necesaria, acudindo ás entrevistas de seguimento.
• Manter unha actitude positiva de colaboración coas persoas profesionais dos servizos sociais.
• Participar de xeito activo no seu proceso de mellora, autonomía persoal e inserción social.
• Destinar as prestacións recibidas ao fin para o que foron concedidas.
• Contribuír ao financiamento do custo dos servizos de acordo coa normativa vixente.
• Cando utilicen as instalacións, observar os regulamentos de réxime interior e as normas de funcionamento ou convivencia.