Este programa ten como obxectivo mellorar a calidade de vida das persoas coidadoras e das persoas dependentes con necesidade atención continuada que se encontren no seu domicilio
Permite o disfrute de estadías temporais por tempo limitado dun servizo residencial ou dun servizo de supervisión e apoio puntual prestado desde os equipamentos especiais.
Quen o pode soliicitar?
Poderase acceder a este servizo sempre que se cumpran as seguintes situacións:
- Que a persoa coidadora non lle poida prestar á persoa dependente a atención axeitada por causa dunha enfermidade, un accidente ou unha intervención quirúrxica.
- Que a persoa beneficiaria viva soa e precise dun período de convalecencia logo dunha enfermidade, un accidente ou unha intervención cirúrxica.
- Necesidade dun período de descanso da persoa coidadora para evitar unha situación de esgotamento físico ou psíquico
Requisitos específicos
- Ser persoa maior e/ou con discapacidade, e estar nunha situación de dependencia, estea ou non recoñecida formalmente.
- Residir na Comunidade Autónoma de Galicia.
- Non requirir tratamento hospitalario.
- Non padecer trastornos mentais ou condutuais graves, e non compensados, que poidan alterar a normal convivencia.
- Non estar sancionado coa revogación da adxudicación da praza pública de xeito definitivo, conforme a Lei 13/2008, do 3 de decembro, de servizos sociais de Galicia.
Como se realiza a tramitación
Para realizar o trámite dende o Departamento municipal de Servizos Sociais do concello de Santiago de Compostela, débese pedir CITA PREVIA co/coa profesional de Traballo Social do PASS que corresponda segundo o domicilio de residencia.
O día da cita é aconsellable aportar a seguinte documentación necesaria para a súa tramitación.
Documentación
- Copia do DNI da persoa solicitante, no caso de que o/a interesado/a non autorice expresamente a comprobación dos datos por medio do acceso telemático ao SVI.
- Acreditación da representación que se ten da persoa solicitante, se é o caso, e copia do DNI da persoa representante, no caso de que esta non autorice expresamente a comprobación telemática dos datos.
- Certificado de empadroamento, emitido polo concello correspondente que acredite a residencia nun municipio da comunidade autónoma no momento de presentar a solicitude, no caso de que o/a interesado/a non autorice expresamente a comprobación dos datos por medio do acceso telemático.
- Informe médico sobre o seu estado de saúde, en que se reflectirá se a persoa necesita ou non apoio para a realización das actividades da vida diaria. Indicarase a previsión de tempo necesario de atención.
- Declaración responsable acerca do patrimonio da persoa solicitante
- Copia do DNI do cónxuxe ou parella de feito, ascendentes ou fillos/as menores de 25 anos ou maiores en situación de discapacidade, economicamente por conta da persoa solicitante, no caso de que non autoricen expresamente a comprobación dos datos por medio do acceso telemático
- Copia da declaración do IRPF correspondente ao último período en que se presente a solicitude,
- Certificado de toda clase de pensións percibidas polo cónxuxe ou parella de feito, ascendentes ou fillos/as menores de 25 anos ou maiores en situación de discapacidade, economicamente por conta da persoa solicitante, ou declaración xurada de non percibilas ou alternativamente autorización das anteriores persoas, así como declaración responsable do patrimonio das citadas persoas
Data
As solicitudes deberán ser presentadas polo menos cun mes de antelación á data indicada para o seu ingreso no servizo, excepto nos casos de urxencia imprevisible en que non haberá prazo mínimo previo para a presentación da solicitude.
