A alcaldesa de Santiago, Goretti Sanmartín, foi a encargada de dar conta en rolda de prensa dos asuntos mais destacados da Xunta de Goberno do 28 de agosto, entre os que salientan a concesión das axudas individuais para uso do servizo de taxi.
Na Xunta de Goberno de hoxe tamén se aprobou a resolución definitiva da convocatoria dos “bonotaxis”, as axudas individuais para o uso do servizo de taxi como medio alternativo para as persoas con dificultades de mobilidade ou que presentan limitacións para o uso do transporte colectivo. Serán un total de 36 as persoas beneficiadas pola convocatoria da Concellaría de Dereitos e Servizos Sociais, das que unha recibirá unha axuda de 150 euros e as 35 restantes percibirán 350 euros. En total, repartiranse 12.200 euros en axudas.
Os “bonotaxis” teñen como obxectivo evitar ou compensar as desvantaxes das persoas con discapacidade ou maiores, e máis en concreto das que residan no rural, para que poidan participar plenamente na comunidade e acceder aos mesmos lugares, bens e servizos que estean a disposición da veciñanza.