O Concello de Santiago, a través da concellaría de Dereitos e Servizos Sociais, pon en marcha un novidoso Servizo Municipal de Atención Inmediata (SMAI), co obxectivo de garantir intervencións urxentes e eficaces en casos como as caídas no domicilio non relacionadas con causas sanitarias ou os traslados urxentes a recursos residenciais ou de acollida. Esta nova ferramenta estará dispoñible as 24 horas e os 365 días do ano, e actuará a demanda do SEMUS ou dos Servizos Sociais Comunitarios Básicos.
O Servizo Municipal de Atención Inmediata é unha ferramenta dirixida especialmente ás persoas maiores, en particular ás preto de 5.000 que viven soas en Santiago, pero tamén ás persoas con discapacidade ou en situación de dependencia que carezan de rede de apoio, e ás persoas con problemas de mobilidade. Trátase dun recurso complementario ao SEMUS, o Servizo Municipal de Urxencias Sociais, que permite atender caídas non sanitarias, é dicir, aquelas nas que a persoa afectada non pode moverse por sí mesma pero que non precisa atención médica. Tamén está pensado para o traslado a centros residenciais ou outros recursos sociais de emerxencia social, mais non a centros sanitarios porque nese caso a competencia é do SERGAS, ao igual que nos casos de caídas sanitarias. O servizo conta con ambulancias e persoal experto en mobilizacións.
O novo Servizo de Atención Inmediata actívase a través dos Servizos Sociais Municipais ou do Servizo Municipal de Urxencias Sociais (SEMUS Compostela).