A concelleira de Dereitos e Servizos Sociais explicou na xuntanza do Consello de Persoas Maiores que tivo lugar no día de hoxe que o Servizo Municipal de Atención Inmediata é unha ferramenta dirixida especialmente ás persoas maiores, en particular ás preto de 5.000 que viven soas en Santiago, pero tamén ás persoas con discapacidade ou en situación de dependencia que carezan de rede de apoio, e ás persoas con problemas de mobilidade. Trátase dun recurso complementario ao SEMUS, o Servizo Municipal de Urxencias Sociais, que permite atender caídas non sanitarias, é dicir, aquelas nas que a persoa afectada non pode moverse por sí mesma pero non precisa atención médica. Tamén está pensado para apoiar a mobilización, mesmo en casos como os de persoas con dificultades para acceder ás súas vivendas por falta de ascesor; ou acompañamento e traslado a centros residenciais ou outros recursos sociais, mais non a centros sanitarios porque nese caso a competencia é do SERGAS, ao igual que nos casos de caídas sanitarias. O servizo conta con ambulancias e persoal experto en mobilizacións.
O novo Servizo de Atención Inmediata actívase a través dos dispositivos de teleasistencia que tamén facilita o Concello a través de Cruz Vermella; dos Servizos Sociais Municipais, da Policía Local ou do 112. María Rozas explicou que no que levamos de 2025 o departamento de Servizos Sociais contabilizou 56 caídas non sanitarias. En 2024 foron un total de 51, casos aos que hai que engadir 19 traslados a residencias por situación de emerxencia social, outro suposto que se atende agora co novo Servizo Municipal de Atención Inmediata.
Outros asuntos
María Rozas tamén deu conta dos avances na elaboración do novo estudo sobre a situación das persoas maiores de Compostela, que actualizará o realizado no ano 2017 co obxectivo de avanzar no proceso de adhesión de Santiago á Rede de Cidades Amigables coas Persoas Maiores. Seguindo as indicacións da Organización Mundial da Saúde, ese informe estase a realizar de maneira participada, e xa se realizaron entrevistas a profesionais e xuntanzas de tres grupos focais: un de persoas de entre 60 e 75 anos, outro de maiores de 75, e outro de persoas maiores do rural.
A concelleira de Dereitos e Servizos Sociais explicou que o estudo estará finalizado nas próximas semanas, e apuntou que “o primeiro borrador danos xa algunhas claves de cales deben ser as liñas de acción municipais no que tén que ver coa mellora dos espazos ao aire libre, a mobilidade, a vivenda, ou a loita contra o idadismo e a soidade non desexada.
Por último, María Rozas deu conta da instalación de buzóns físicos para a entrega de queixas e suxestións, unha demanda que realizara a Plataforma de Pensionistas nunha reunión anterior do Consello Municipal de Persoas Maiores. Este recurso está dispoñible xa nos CSC do Ensanche, Santa Marta, Conxo, Castiñeiriño, Romaño e Maruxa e Coralia, e prevese ampliar a outros centros, tamén da zona rural.